Danshljómsveit Friðjóns Jóhannssonar. Ráðningar og pöntunarsími 862-1403 netfang frjo@simnet.is

19.08.2017 20:37

Uppgjör í sumarlok.

Því miður höfum við í Danshljómsveit Friðjóns, verið heldur latir við að setja inn á heimasíðuna okkar, enda fer nú flest fram facebook. Samt viljum við halda í þessa litlu síðu okkar. Í sumarlok sem eru von bráðar, þökkum við fyrir óvenju litríkt og fjörugt sumar. Sjómannadagur, afmæli, Bræðslan á Bf, Húsbílaeigendur, ekta sveitaböll og núna næst er "smá reisa" á Rjómaball Vestfirðinga að Núpi í Dýrafirði. Að öllu þessu ólöstuðu þá verðum við að viðurkenna að ferð okkar til Malung í Svíþjóð stendur líklega uppúr hvað upplifun snertir, en þar spiluðum við á Dansbandsveckan sem haldin er í Malung í Svíþjóð, sem er lítill 5000 manna bær í Dölunum. (ca mið Svíþjóð) Þarna var þessi rótgróna hátíð haldin í 32 skiptið og dansað frá sunnudagskvöldi til laugardagskvölds helgina eftir á 6 aðskildum dansstöðum, sem allir eru þó á sama svæðinu sem nefnist Orrskogen. Á hverjum "bana" eins og þeir kalla það, eru tvær hljómsveitir á hverju kvöldi þannig að tólf hljómsveitir koma fram á hverju kvöldi eða samtals 84 hljómsveitir yfir vikuna og eru þarna lang flestar þekktustu danshljómsveitir Skandinavíu. Á dansleikina koma þessa vikuna milli 45-50 þúsund manns. Við fengum þann heiður að vera fyrsta íslenska hljómsveitin á þessari hátíð og var það mikil og góð reynsla, sem var þó í raun átakalaus fyrir okkur þar sem sú danstónlist sem við spilum að öllu jöfnu féll greinilega vel í kramið og vorum við ráðnir aftur að ári liðnu á sama stað og sama tíma, en það er ekki sjálfgefið, því kröfurnar til góðrar danstónlistar eru miklar. Það var kannski mesta upplifunin hvað þessi kúltúr þ.e. dansinn heldur sinni hefð í Skandinavíu, en því miður virðist þessi dansmenning eiga verulega í vök að verjast hér á okkar ágæta landi.
Þá viljum við í Danshljómsveit Friðjóns Jóhannssonar þakk af auðmýkt þær frábæru viðtökur sem útgáfur okkar hafa fengið hjá almenningi (ekki fjölmiðlum,) Nýji diskurinn okkar Austfirskir staksteinar 3 hefur selst vel og eru nú farin vel á annað þúsund eintök af honum, sem gerir okkur kelift að hugsa að næstu útgáfu, sem er raunar komin í gang nú þegar. Ef þessar viðtökur væru ekki fyrir hendi væri þessum björgunaraðgerðum á austfirsku efni sjálfhætt, því að við höfum ekki leitað eftir styrkjum frá einum eða neinum vegna þessarar útgáfustarfsemi undanfarið. Þá hefur safndiskurinn okkar "44 íslensk alþýðu dans og dægurlög" sem hefur að  geyma eldri diskana okkar sem allir voru uppseldir og ófáanlegir selst jafnt og þétt og gerir enn. 
En nú líður að hausti og vetri og endilega hafið samband ef þið eruð í forsvari fyrir þorrablóti, árshátíð, afmæli, o.s.frv og fáið tilboð frá okkur.  Förum hvert á land sem er, það eru engar vegalengdir á Íslandi :-)  

16.10.2016 19:03

Nýr diskur Austfirskir staksteinar 3

Setjum hér inn þann pistil sem fylgir með í nýja albúminu með "Austfirskum staksteinum 3" Þarna má sjá ýmsar upplýsingar um útgáfuna. 

Diskurinn er væntanlegur í næstu viku. Ef þið hafið áhuga á diskinum er einfaldast að senda tölvupóst á frjo@simnet.is, einnig á Facebook eða í síma 862-1403 Friðjón. Vekjum einnig athygli á því að tvöfaldi safndiskurinn okkar er einnig kominn í þriðju útgáfu og tilbúinn til afhendingar. 


Fylgt úr hlaði.

 Þá er enn og aftur komið að því að við í Danshljómsveit Friðjóns Jóhannssonar látum til skarar skríða og gefum nú út 16 lög eftir 17 austfirska laga og textahöfunda. Hljómsveitin er stofnuð á Egilsstöðum haustið 1995 og hefur starfað óslitið síðan þá. Meðlimir sveitarinnar eru þeir sömu frá upphafi, Árni Jóhann Óðinsson, gítar og söngur, Friðjón Ingi Jóhannsson, bassi og söngur og Daníel Friðjónsson, trommur, en á útgáfunum okkar spilar hann einnig á hljómborð og klarinettur.

Útgáfuna köllum við "Austfirska staksteina 3", enda höldum við hér áfram þeirri viðleitni okkar að varðveita dans- og dægurlög eftir hina ýmsu höfunda sem flestir tengjast Austurlandi á einn eða annan hátt.

Þessa útgáfustarfsemi hefur hljómsveitin unnið að til hliðar við hefðbundinn hljómsveitarrekstur allt frá stofnun, en í okkar huga eru höfundarnir og varðveisluhugsjónin aðal málið í þessu verkefni.

Fyrsti diskurinn kom út árið 1996 og bar hann nafnið "Austfirskir staksteinar". Á þeim diski voru 13 lög eftir 19 austfirska laga og textahöfunda. Árið eftir eða 1997 fór hljómsveitin í það verkefni að taka upp 19 lög eftir hinn góðkunna lagahöfund frá Fáskrúðsfirði, Óðinn G. Þórarinsson. Hlaut sá diskur nafnið "Við tónanna klið". Síðan varð nokkuð hlé á útgáfum, en árið 2000 kom hljómsveitin töluvert að útgáfu Magnúsar Bjarna Helgasonar frá Borgarfirði eystra, á diskinum "Fjörðurinn okkar" sem hefur að geyma lög og texta eftir heimamenn á Borgarfirði. Það er síðan árið 2003 sem hljómsveitin gefur út diskinn "Austfirska staksteina 2", sem inniheldur 15 lög eftir 17 laga og textahöfunda. Allir þessir diskar eru nú algelega ófáanlegir og var því brugðið á það ráð árið 2006 að gefa út tvöfaldan safndisk með öllum þeim íslensku lögum sem hljómsveitin hafði gefið út frá byrjun og flutu nokkur lög með á þann disk sem ekki höfðu komið út áður. Sú útgáfa ber nafnið "44 íslensk alþýðu dans og- dægurlög" og inniheldur eins og nafnið segir til um, 44 lög eftir alls 42 laga og textahöfunda. Nú þegar þessi diskur er kominn út eru þau íslensku lög sem við í Danshljómsveit Friðjóns Jóhannssonar höfum tekið upp og gefið út, orðin 60 talsins og laga og textahöfundar eru nú alls orðnir 51.

Til að svona útgáfa verði að veruleika þarf að tvinna saman marga ólíka þræði og viljum við í hljómsveitinni þakka sérstaklega þeim höfundum sem treyst hafa okkur fyrir verkum sínum, en samskipti við þá hafa verið í alla staði afskaplega ánægjuleg.

Þá viljum við færa Brynleifi Hallssyni á Akureyri sérstakar þakkir, en hann hefur séð um upptökur og alla hljóðvinnslu á þessari útgáfu, en án hans hefði þessi útgáfa ekki orðið að veruleika, en hann sá einnig um alla hljóðvinnslu á safndiskinum okkar. Brynleifur spilar einnig hljómborð og gítar í nokkrum lögum.

Við höfum einnig fengið góða gesti í hljóðfæraleikinn með okkur og þökkum við þeim Valmari Väljaots sem lagði til snilli sína í 8 lög á harmoniku, orgel, píanó og fiðlu, Einari Braga Bragasyni fyrir hans magnaða saxa og þverflautuleik í 4 lögum, Rut Berg Guðmundsdóttir sem lagði til sína snilli á harmonikuna í þrem lögum, Hafdísi Þorbjörnsdóttir og Helgu Jónu Óðinsdóttir, en þær lögðu til raddir sínar í sitt hvort lagið, Birni Þórarinssyni sem spilar á píanó í einu lagi og Árna Katli Friðrikssyni sem spilar á trommur í  einu lagi. Þá eru á diskinum tvö lög eftir Sigþrúði Sigurðardóttur sem undirritaður söng á sínum tíma inn á útgáfu hennar "Undir regnboga" árið 2011,  en þar sá hinn snjalli tónlistarmaður á Egilsstöðum Hafþór Valur Guðjónsson um nánast allan undirleik og upptökur. Einnig spilar Ármann Einarsson á harmóníku í öðru laginu. Færum við þeim bestu þakkir fyrir góðfúslegt leyfi til að fá þessi ágætu lög á útgáfuna.

Um leið og við þökkum fyrir frábærar viðtökur um allt land við fyrri útgáfum ,  það er von okkar að þú lesandi og kaupandi góður hafir nokkra ánægju af þessari útgáfu.

Kærar þakkir!

Fyrir hönd Danshljómsveitar Friðjóns Jóhannssonar

Friðjón Ingi Jóhannsson sími 862-1403 netfang frjo@simnet.is

 

 

 

 

 

 

 

  • 1
Flettingar í dag: 9
Gestir í dag: 5
Flettingar í gær: 29
Gestir í gær: 11
Samtals flettingar: 90843
Samtals gestir: 33339
Tölur uppfærðar: 22.1.2018 11:50:09

Tenglar