Lög Óðins G. Þórarinssonar

Frá Danshljómsveit Friðjóns. Smá fróðleikur um næsta útgáfuverkefni, 32-34 laga yrilitsútgáfu á lögum Óðins G. Þórarinssonar frá Fáskrúðsfirði.  Höfum opnað fyrir pantanir á útgáfunni og ef þið hafið áhuga, sendið bara skilaboð eða meldingu ásamt heimilisfangi hér á f.b. einnig í síma 862-1403 Friðjón eða póstfangið frjo(at)simnet.is.

Látum hér fylgja með glóðvolgt lag sem hvergi hefur heyrst áður.  "Sumardans" eftir Óðin, við ljóð Stefáns Bragasonar. Þarna syngur meistari Óskar Pétursson með okkur og Valmar Väljaots spila á hljómborð og fiðlu.

Um þessar mundir vinnum við í Danshljómsveit Friðjóns ásamt Brynleifi Hallssyni upptökumanni, Valmari Väljaots og söngvaranum Óskari Péturssyni, hörðum höndum að upptökum á efni austfirska lagahöfundarins Óðins G. Þórarinssonar frá Fáskrúðsfirði. Að öðrum ólöstuðum er Óðinn einn öflugasti lagahöfundur sem Austurland hefur átt og á það við bæði um magn og gæði.  Óðinn er fæddur 7. Nóvember 1932 og verður því 87 ára nú í nóvember, en hann er enn á fullu í tónlistinni og fylgist vel með þeirri vinnu sem nú er í gangi. Lög Óðins urðu nokkur landsþekkt strax á sjötta áratungnum og má þar nefna lög eins og "Nú liggur vel á mér" (1sæti F.Í.D 1958) "Heillandi vor" (1 sæti S.K.T 1955) "Síðasti dansinn" (3. Sæti S.K.T 1954). Svo má ekki gleyma hinu vinsæla lagi  "Blíðasti blær" frá árinu 1966, en það lag kom fyrst út með okkur í Danshljómsveit Friðjóns árið 1997 á diskinum "Við tónanna klið".  Stefnt er á að gefa út nokkurs konar heildaryfirlit yfir verk Óðins og áætlað að út komi 32-34 laga tvöfalt albúm nú í haust ef tími og fjármunir leyfa, en svona verkefni er mjög kostnaðarsamt og ekki hjálpar til að nú er búið að tala niður geisladiskinn og farið að nota streymisveitur til hlustunar á tónlist, oft í lélegum gæðum, sem nánast engu skila til þeirra sem gefa út tónlist. Því leituðum við til ýmissa fyrirtækja og sjóða á Austurlandi með stuðning við verkefnið og fengum þar jákvæð viðbrögð frá  Alcoa Fjarðaáli sem styður okkur um 200 þús. krónur og Menningar og nýsköpunarsjóð Fjarðabyggðar sem styður verkefnið um  100 þús. krónur og kunnum við þessum aðilum bestu þakkir fyrir veittan stuðning. Öðrum umsóknum til fyrirtækja og sjóða á Austurlandi var alfarið hafnað. Sú hugmynd hefur komið upp að fara í fjármögnun á Karolina Fund, en við ætlum bara að nota gömlu aðferðina og bjóða ykkur fylgjendur góðir hér á fb að panta eintak af útgáfunni þannig að þið fáið diskinn í hendurnar strax og hann kemur úr framleiðslu. Síðan höfum við sama háttinn á og áður að við sendum miða með bankaupplýsingum. Áætlað verð er kr 3500   og opnum við hér með fyrir pantanir. Þá er einnig í vinnslu að gefa út nótubók með lögum Óðins, en þar verða öll lögin á diskinum og mörg önnur sem ekki hafa komið út. Þar sem þetta verður að öllum líkindum síðasta útgáfan sem við í Danshljómsveit Friðjóns stöndum fyrir, ( vegna gengisfalls geisladisksins, þó enn sé af nógu að taka) viljum við þakka ykkur öllum fyrir stuðninginn með því að kaupa þær útgáfur sem við höfum staðið fyrir. Við hófum þetta ferli árið 1996 með útgáfu "Austfirskra staksteina", 13 laga disk með austfirsku efni, síðan 1997 gáfum við út diskinn "Við tónanna klið" 19 laga disk með lögum Óðins G. Árið 2003 kom síðan út diskurinn "Austfirskir staksteinar 2" 15 laga diskur með efni austfirskra höfunda. Árið 2006 gáfum við svo út tvöfalda safndiskinn "44 íslensk alþýðu dans- og dægurlög" með efni af áður útgefnum diskum (sem voru orðnir ófáanlegir), plús nokkur lög sem ekki höfðu komið út áður. Viðtökur við þeim diski voru vægast sagt frábærar. Síðan árið 2016 kom út diskurinn "Austfirskir staksteinar 3" 16 laga diskur með austfirsku efni. Með þessum útgáfum og þeirri sem nú er í gangi  hefur okkur tekist að varðveita yfir  80 lög eftir um 55 laga og textahöfunda. Hér er ekki um "hagnaðardrifið" verkefni að ræða eins og gjarnan er talað um í dag, þetta er fyrst og fremst varðveislu og hugsjónastarf, að sjálfsögðu í bland við króníska söfnunaráráttu. Við höfum haft þann háttinn á frá upphafi hvað fjármögnun varðar, að tekin er væn yfirdráttarheimild 1-2 milljónir og síðan vonast til að útgáfan standi undir því og hefur þetta gengið þannig fyrir sig frá upphafi. Þegar útlögðum kostnaði við eitt verkefni hefur verið náð (án allra greiðslna til okkar í hljómsveitinni) hefur sá afgangur farið í undirbúning á næsta verkefni.  

Síðan minnum við á að ennþá eru útgáfurnar "44 íslensk alþýðu dans- og dægurlög"  og "Austfirskir staksteinar 3" fáanlegar hjá okkur, einnig DVD diskurinn "Þegar að dansinn dunar" sem kom út nú seint á síðasta ári og er þar aðalefnið ferð okkar á hina mögnuðu danshátíð "Svenska dansbandsveckan" í Malung í Svíþjóð. Vonumst eftir góðum viðtökum á þessu efni okkar hér eftir sem hingað til, með góðum kveðjum. Danshljómsveit Friðjóns Jóhannssonar.